Unha das receitas máis representativas da gastronomía galega, as filloas, con outro dos produtos estrela desta terra, o marisco. Estes saquiños recheos de bacallau e marisco son unha aposta segura para sorprender aos teus invitados cos teus entrantes de Nadal. Unha receita de luxo. Que aproveite!
Pelamos e limpamos os gambones. Cortámolos en anacos e facemos o mesmo co bacallau.
Picamos a cebola mentres quentamos o aceite nunha tixola.
Deixamos que se faga a cebola. Engadimos o bacallau e os gambóns e deixamos que se fagan durante un minuto. (Neste momento pódese salpimentar, pero tanto o bacallau como o marisco xa achegan sal á receita).
Engadimos os berberechos e o viño branco e deixamos que reduza a salsa.
Cando a salsa se vaia reducindo, engadimos a fariña e revolvemos para integrala.
Engadimos leite e revolvemos continuamente ata que a salsa empece a espesar.
Retiramos e reservamos.
Facemos as filloas seguindo a receita tradicional galega.
Enchemos as filloas coa bechamel, o bacallau e o marisco, pechamos cun cordón de rafia e empratamos.